Tuesday, 4 October 2016

दुधे बच्चा छाडेर जाँदापनि एककिलो चामल पाइएन.....

जाजरकोट । जाजरकोटको नायकवाडा–९ धुमाकी आइती चलाउने ८ महिने दुधे छोरा अर्काको जिम्मा छाडेर बिहानै घाट डिपोमा चामल लिनका लागि निस्किइन् । करिब चारघन्टा पैदलहिडेर हिँडेर खाद्य डिपोमा पुग्दा नपुग्दै आएको सबै चामल सकियो ।

एकातिर दुधे छोरा छोड्नुपर्दाको अवस्था, अर्कोतिर चामल नपाउनुको पीडा आइतीलाई पीडा खपिनसक्नुभयो । आइतीजस्तै नायकवाडाकै वडा ८ ताँसीबाट दसैंका लागि चामल पाउने आशामा घाट डिपोमा आएका पवन विकले पनि एकगेडा चामल पाएनन् ।

घरमा ६ दिनकी सुत्केरी छोडेर आएको बताउने पवन श्रीमतीलाई खुवाउने र दसैं मनाउने चामल लिन डिपो आएका थिए । न उनकी श्रीमतीले भात खान पाउने अवस्था भयो, न त उनको दसैंमा भातले खुसी ल्याउने भयो ।

हुनेखानेका लागि घरमा महँगो चामल र खसीको व्यवस्था गरिने तर हुँदामात्र खानेले भने आँसु पुच्छदै बस्नुपर्ने बाध्यता यहाँका बासिन्दाको छ ।

आइती र पवनभन्दा अघि आएर चामल पाएका स्थानीयवासीले पनि दुई किलोदेखि पाँच किलोसम्म चामल सीमित व्यक्तिलेमात्र पाएका थिए ।

बारेकोटको जनसंख्या करिब १८ हजारको हाराहारीमा छ । तर, यो जनसंख्यालाई ८१ क्विन्टल चामलले दसैं र तिहार मनाउनुको विकल्प छैन ।

यो जिल्लाको सबैभन्दा बढी दुर्गम र पिछडिएको क्षेत्र हो । यहाँ नायकवाडा, रोकायगाउँ, रामीडाँडा र सक्ला गाविस छन् । जिल्लाकै सबैभन्दा उत्पादनका हिसाबले कम उत्पादन हुने क्षेत्र पनि यही हो ।

उच्च हिमाली क्षेत्र भएका कारण सहजै खाद्यान्न ढुवानीकार्य पनि सहज छैन । प्रहरीको घेरामा खाद्यान्न वितरण गर्दापनि एककिलो चामल नपाउनुको पीडा कस्तो होला रु सहजै अनुमान लगाउन सकिन्छ ।

वर्षायाममा भत्किएको बाटो मर्मत नहुनु र नलगाड जलविद्युत् आयोजनाका लागि पहुँचमार्ग निर्माण भइराखेकाले खाद्यान्न ढुवानी गर्ने बाटोसमेत अवरुद्ध भएको वीरेन्द्र ऐश्वर्य उच्च माविका प्राचार्य गोरखबहादुर सिंह बताउँटन् ।

उनी भन्छन्–‘साँच्चिकै बारेकोटलाई राज्यले न्याय गर्ने हो भने हेलिकोप्टरबाट खाद्यान्न ढुवानी गर्नुपर्छ ।’

‘बारेकोटवासीलाई प्रत्येक वर्ष आउने दसैं, तिहारजस्ता पर्वले हाँसो अनि खुसीमात्र बोकेर ल्याउँदैन, पीडापनि सँगै बोकेर ल्याएको हुन्छ’–रामीडाँडा सिर्पाचौरका हरिबहादुर थापाले बेदना सुनाए–‘सदरमुकामबाट करिब तीन दिनको दूरीमा रहेको यस क्षेत्रमा खच्चडबाट दैनिक उपभोग्य सामग्री ढुवानी गर्नुपर्ने बाध्यता छ । ढुवानी गरेको खाद्यान्न र अरु दैनिक उपभोग्य सामग्रीभन्दा ढुवानी भाडा बढी तिर्नुपर्ने पीडाले गर्दा यहाँ ल्याइएका वस्तुहरु छोइनसक्नु छ ।’

यहाँका अधिकांश पुरुष भारतमा कमाइका लागि जाने हुँदा घरमा बच्चाबच्ची र महिलामात्र हुने गर्छन् । काम गर्नसक्ने उमेरका सबै युवाले घर छाड्ने चलनले पनि अधिकांश खाद्यान्न वस्तु आयात गर्नुपर्दछ ।

About

सत्य तथ्य समाचार,मनोरञ्जनात्मक खबरका साथै विश्वमा के घटना घटिरहेको छ संसारलाई एकै पटक र एकै ठाउँबाट हेर्नलाई नयाँ खबरमा प्रकाशित समाचार र विभिन्न भिडियोहरु हेर्नुहोस ।

Like Us