Friday, 1 July 2016

वर्षासँगै मुग्लिन सडक पुनः अबरुद्ध, यात्रु र सवारी साधन अलपत्र

चितवन, १७ असार । चितवनको चन्डिभञ्याङ–९ स्थित पाँच किलो भन्ने स्थानमा माथिबाट खसेको ठूलो ढुङ्गोका कारण नारायणगढ–मुग्लिन सडक अवरुद्ध हुन पुगेको छ ।

भारी वर्षासँगै खसेको ढुङ्गा सडकमा तेर्सिंदा आज बिहान ५ः५० बजेदेखि सडक अवरुद्ध हुन पुगेको जिल्ला प्रहरी कार्यालय चितवनले जानकारी दिएको छ । सो क्षेत्रमा ढुङ्गा खसेको र अन्य ठाउँठाउँमा पहिरो खसेकाले अहिले मुग्लिन र नारायणगढबाट दुईवटा डोजर तथा लोडरसहित प्रहरी पठाइएको छ । वर्षा जारी रहेकाले पहिरो पुनः खस्ने डर रहेको जनाइएको छ ।

सडक बन्द हुँदा उक्त खण्डमा गाडीको लामो लाइन लागेको छ । केही दिनअघि पहिरोले यहाँ एउटा कार नै पुरेको थियो । गाडी रोकिँदा पहिरोले गाडी नै पुर्ने जोखिमसमेत बढ्दोछ ।

सामान्य पानी पर्दासमेत सो क्षेत्रमा पहिरो खसेर सडक अवरुद्ध हुँदै आएकाले वैकल्पिक मार्ग अपनाउन चितवनका प्रहरी प्रमुख वसन्त कुँवरले सबैमा आग्रह गर्नुभएको छ । नारायणगढ –मुग्लिन सडक आयोजनाले पनि केही लामो भए पनि बर्सातको समयमा वैकल्पिक मार्ग अपनाउन अपिल गरेको छ ।

यहाँ आयोजनाले सडक विस्तारका लागि विभिन्न क्षेत्रमा खनेकाले सोही क्षेत्रमा पानी पर्दा पहिरो खस्दै आएको छ । दैनिक सात हजारभन्दा बढी सवारी चल्ने सो सडकखण्ड बन्द हुँदा चितवनबाट काठमाडौँ, पोखरा क्षेत्र जाने आउने सवारी पूर्णरुपमा रोकिन्छन् । रासस

About

सत्य तथ्य समाचार,मनोरञ्जनात्मक खबरका साथै विश्वमा के घटना घटिरहेको छ संसारलाई एकै पटक र एकै ठाउँबाट हेर्नलाई नयाँ खबरमा प्रकाशित समाचार र विभिन्न भिडियोहरु हेर्नुहोस ।

Like Us