Friday, 15 April 2016

आठ वर्षसम्म छोरा थिएँ, त्यसपछि छोरी भएँ -अस्मि श्रेष्ठ, मिस नेपाल–२०१६


खासमा उनको नाम अस्मि हो तर पत्रिका र अनलाइनभरि उनको नाम अश्मी भएर आएकोमा उनको दुखेसो छ । आखिर नामकै लागि हरेकले दु:ख गरिरहेका छन् । संसारमा नामकै लागि अनेक रेकर्ड राखिन्छ भने आफ्नो नामको हिज्जेमा त्रुटि भएकोमा दु:ख लाग्नु अस्वभाविक पनि होइन । अस्मि ब्युटिफुल मात्र छैनन्, अलिकति बोल्ड पनि छिन् । यो कुरा उनलाई भेटेपछि नै थाहा हुन्छ ।

महिलालाई आरक्षण चाहिन्छ कि चाहिँदैन भन्ने प्रश्नमा उनले दिएको उत्तर पनि कम छैन । अस्मिले मिस नेपालको अन्तिम राउन्डमा दिएको उत्तर थियो, ‘महिलालाई आरक्षण चाहिँदैन, किनभने आरक्षणबिना नै यसअघि तीन जना महिलाले सीएनएन हिरोको उपाधि जितिसकेका छन् भने हामीले राष्ट्रपति पनि पाइसकेका छौं । २२ वर्षीय अस्मिले मिस नेपालबाहेक मिस इन्टलेक्चुअल, मिस फोटोजेनिक तथा बेस्ट इभनिङ गाउनको उपाधि पनि जितेकी थिइन् । केही विज्ञापन र दुई दर्जनजति र्‍याम्प मोडलिङमा भाग लिइसकेकी अस्मि प्रतियोगिताअघि नै आममानिसको नजरमा परिसकेकी थिइन् । यिनै सुन्दर र बोल्ड युवतीसँग साप्ताहिकले अन्तरंग कुराकानी गरेको थियो ।

तपाईं चितवनमा जन्मिएर त्यतै हुर्किएकी युवती, चितवनको के–के कुरा मिस गर्नुहुन्छ ?
साइकल चढेको, त्यहाँको खोलामा पौडी, क्रिकेट आदि खेलेको निकै सम्झन्छु । त्यहाँ लेडी क्रिकेटको टिम थियो र म क्रिकेट खेल्न च्याम्पियन थिएँ । त्यसो त म पढाइमा पनि सधैं फस्ट आउँथें । सानैदेखि टिचर हुने रहर थियो, साथीहरूलाई सिकाउँथे । बडो स्मार्ट केटो थिएँ ।
केटो ? 

हो, केटो । म आठ वर्षको हुँदासम्म केटाकै पहिरनमा हिँड्थें । दिदीको जन्मपछि मेरा बुवा–आमा छोरा चाहनुहुन्थ्यो, तर छोरी जन्मिई । बुवालाई म छोरी भएको विश्वास नै भएन । त्यसैले उहाँले मप्रति सधैं छोराकै व्यवहार गर्नुभयो । केश छोटो कटाइदिनुहुन्थ्यो । केटाकै पहिरन र केटाकै स्वतन्त्रता दिनुहुन्थ्यो । घर छेउछोउबाहेक म छोरी भन्ने कसैलाई थाहा थिएन । एकपटक हाम्रो स्कुलमा विदेशबाट भोलेन्टिर शिक्षक पढाउन आउनुभयो । एसेम्बलीमा केटीको लाइनमा देखेर उहाँले मलाई केटाको लाइनमा ल्याएर राखिदिनुभयो । म फेरि खुसुक्क केटीको लाइनमै गएर बसेँ । उहाँले फेरि केटाकै लाइनमा राख्नुभयो । अति भएपछि मैले उहाँलाई म छोरी हुँ भन्नुपरेको थियो । म आठ वर्षकी हुँदा भाइ जन्मियो । त्यसपछि बल्ल मलाई बुवाले दसैंमा छोरीको पहिरन किनिदिनुभयो ।


About

सत्य तथ्य समाचार,मनोरञ्जनात्मक खबरका साथै विश्वमा के घटना घटिरहेको छ संसारलाई एकै पटक र एकै ठाउँबाट हेर्नलाई नयाँ खबरमा प्रकाशित समाचार र विभिन्न भिडियोहरु हेर्नुहोस ।

Like Us