Saturday, 12 December 2015

खाना पकाउने ग्यास नेपालमै उत्पादन गरिदै


२७ मंसिर, काठमाडौं ।भारतीय नाकाबन्दीका कारण सारा नेपालीको चुलो निम्यो ग्यास अभावका कारण । अझै पनि नेपालीहरु संकटमा रहेका छन् । तर नेपालमै ग्यास उत्पादन गरेर सिलिन्डरमा भरी खाना पकाउनेहरु पनि बढ्दै गएका छन् । इच्छा शक्ति भयो भने असम्भव केही छैन भन्ने कुरा सुनसरीमा देखिएको छ ।
 सुनसरीको धरानमा गाईको मलमुत्रबाट बायोग्यास उत्पादन सुरु गरिएको छ । स्थानीय व्यवसायी घनेन्द्र कार्की र लोकबहादुर खापुङले ५० लाख रुपैयाँको लगानीमा २ सय घनमिटर क्षमताको बायो ग्यास प्लाण्ट निर्माण गरी बायो ग्यास उत्पादन सुरु गरेका हुन् ।

भारतले लगाएको अघोषित नाकाबन्दी र मधेसी मोर्चाको तराई बन्दका कारण खाना पकाउने एलपी ग्यासको हा–हाकार भइरहेका बेला बायो ग्यास उत्पादनले केही राहत मिल्ने अपेक्षा स्थानीयले गरेका छन् ।

धरान उपमहानगरपालिका–२६ स्थित विष्णुपादुकामा निर्माण गरिएको बायो ग्यासबाट दैनिक १० सिलिण्डर ग्यास उत्पादन गरिँदै आएको छ । यो बायो ग्यासबाट ६२ दशमलव ५ केभी विद्युतसमेत उत्पादन हुने भारतीय इन्जिनियर अरविन्द सिंहले जानकारी दिए ।

कार्की र खापुङले सञ्चालनमा ल्याएको केके लाइभस्टक एण्ड एग्रिकल्चर रिसर्च सेन्टरमा पालिएका गाई, बंगुर, खसीको मलमुत्रबाट बायो ग्यासको उत्पादन सुरु गरिएको हो । यो प्रविधि सबैतिर विस्तार गर्ने हो भने ग्यासमा परनिर्भरता कम हुने विज्ञहरुले बताएका छन् ।

About

सत्य तथ्य समाचार,मनोरञ्जनात्मक खबरका साथै विश्वमा के घटना घटिरहेको छ संसारलाई एकै पटक र एकै ठाउँबाट हेर्नलाई नयाँ खबरमा प्रकाशित समाचार र विभिन्न भिडियोहरु हेर्नुहोस ।

Like Us