Thursday, 10 December 2015

पोसाक नलगाउने ६६ कर्मचारी कारबाहीमा

काठमाडौं—सरकारले तोकिएको पोसाक नलगाउने ६६ निजामती कर्मचारी कारबाहीमा परेका छन्। सामान्य प्रशासन मन्त्रालयको अनुरोधमा राष्ट्रिय सतर्कता केन्द्रले बिहीबार कार्यालय समय सकिने समयमा गरेको अनुगमनका क्रममा तोकिएको पोसाक नलगाई सिंहदरबार प्रवेश गर्ने कर्मचारी कारबाहीमा परेका हुन्।
कारबाहीमा पर्ने कर्मचारीमा गृह मन्त्रालयका पाँच, अर्थका सात र सङ्घीय मामिला तथा स्थानीय विकास मन्त्रालयका छ कर्मचारी छन् । यस्तै पोसाक नलगाउने विज्ञान प्रविधि तथा वातावरण मन्त्रालयका तीन, सहकारी तथा गरिबी निवारणका दुई र ऊर्जा मन्त्रालयका सात कर्मचारी छन्।

केन्द्रका अनुसार सिँचाइ मन्त्रालयका दुई, महिला, बालबालिका तथा समाजकल्याण मन्त्रालयका छ, शिक्षा मन्त्रालयका १३, सूचना तथा सञ्चार प्र्रविधि मन्त्रालयका १४ र सहरी विकास मन्त्रालयका एक कर्मचारी छन् । तोकिएको पोसाक नलगाई कार्यालय आउनेमा एक सहसचिव, १० उपसचिव, १५ शाखा अधिकृत र ४० सहायकस्तरका कर्मचारी छन् ।

सामान्य प्रशासन मन्त्रालयले सरकारी कार्यालयमा सरकारी कर्मचारी हो कि बिचौलिया हो छुट्याउन नसकिएको भन्दै आपत्ति प्रकट गरेपछि केन्द्रले आजदेखि स्थलगत अनुगमन गरी पोसाक नलगाउने कर्मचारीलाई कारबाही गर्न सुरु गरेको हो । पोसाक नलगाउने कर्मचारीलाई सचेत गराउने र सम्बन्धित कार्यालय प्रमुखलाई कारबाहीका लागि सिफारिस गरिने केन्द्रका सहायक प्रवक्ता रुद्रप्रसाद पौडेलले जानकारी दिनुभयो ।

सामान्य प्रशासन मन्त्रालयका सचिव टङ्कमणि शर्माले बुधबार नै पोसाक नलगाई कार्यालय आउने कर्मचारीलाई कारबाही गरिने जानकारी दिनुभएको थियो ।

विशेष गरी सेवाग्राहीको बढी भिडभाड हुने कार्यालयमा कर्मचारीले तोकिएको पोसाक नलगाई बसेका कारण बिचौलिया र कर्मचारी छुट्याउन नसकेको भन्दै गुनासो आएपछि सामान्य प्रशासन मन्त्रालयले आवश्यक कारबाही गरिदिन केन्द्रलाई आग्रह गरेको थियो । रासस

About

सत्य तथ्य समाचार,मनोरञ्जनात्मक खबरका साथै विश्वमा के घटना घटिरहेको छ संसारलाई एकै पटक र एकै ठाउँबाट हेर्नलाई नयाँ खबरमा प्रकाशित समाचार र विभिन्न भिडियोहरु हेर्नुहोस ।

Like Us