यात्रुबाहक बसमा पेट्रोल बम प्रहार, प्रहरीद्वारा ३० राउण्ड फायरिङ

जनकपुरधाम— स्कर्टिङ गरेर यात्रुबाहक बस र विभिन्न मालबाहक गाडी लगिरहेका बेला धनुषाको ढल्केवरमा आन्दोलनकारीले पेट्रोल बम प्रहार गरेपछि झडप भएको छ। झडपका क्रममा प्रहरीले गरेको लाठी र गोली प्रहारबाट करिब ११ जना आन्दोलनकारी घाइते भएका छन्। प्रदर्शनकारीले दुई वटा बसको सिसा फुटाइदिएका छन्। ढुङ्गा लागेर एक जना चालकको टाउको फुटेको छ। एक जना महिला यात्रु घाइते भएकी छन्। उनीहरुको उपचार स्थानीय स्वास्थ्य संस्थामा भइरहेको छ ।
राति करिब २ बजे प्रहरीले स्कर्टिङ गरेर यात्रुबाहक बस र विभिन्न मालबाहक गाडी लगिरहेका बेला संयुक्त लोकतान्त्रिक मधेसी मोर्चाका कार्यकर्ताले ढुङ्गा प्रहार गरेका थिए।
 प्रदर्शनकारीले गाडीमाथि ढुङ्गा प्रहार गर्न थालेपछि स्थितिलाई नियन्त्रणमा लिन प्रहरी करिब ३० राउण्ड हवाई फायर गरेको थियो। घाइतेमध्ये अधिकांशको शरीरमा गोलीको छर्रा लागेको छ ।
जिल्ला प्रहरी कार्यालय धनुषाका प्रमुख प्रहरी उपरीक्षक रामदत्त जोशीले सवारीसाधनलाई गन्तव्यतर्फ पुर्याउने क्रममा प्रदर्शनकारीले ढुङ्गा प्रहार गर्न थालेपछि परिस्थितिलाई नियन्त्रण २५ देखि ३० राउण्डसम्म हावामा गोली चलाउनुपरेको जानकारी दिए।
 अहिले ढल्केबर क्षेत्र तनावग्रस्त छ । रासस