Friday, 25 September 2015

दक्षिणी नाकामा समस्या आएपछि चीनतिरको नाका खोल्ने तयारी

संविधान जारी भएपछि मधेशवादीले गरेको आन्दोलनमा भारतले अप्रत्यक्ष रुपमा साथ दिंदै नेपाललाई लगभग नाकाबन्दीको स्थितिमा पुर्याएपछि नेपालले उत्तरी नाकाहरुबाट अत्यावश्यक बस्तु ल्याउने जमर्को गरेको छ ।
वैशाख १२ गतेको भूकम्पपछि चीनसंग जोडिएको सबभन्दा ठूलो नाका तातापानी जाने राजमार्ग अबरुद्ध भएपछि चीनसंगको व्यापार पनि राकिएको छ । यस्तोमा भारतबाट नेपाल भित्रिने नाकाहरु कहिलेसम्म अबरुद्ध हुने हो त्यसको टुंगो लागेको छैन ।
देशमा दशैं, तिहार लगायतका चाडपर्वहरु सुरु हुन थालेको छ । त्यसैले नजिकिँदो चाडावाडसँगै भारतले नेपाल भित्रिने मालवाहक गाडीको आवतजावतमा कडाइ गरेपछि सरकारले चीनसँगका नाका खोल्न पहल गरेको छ ।
दसैं तिहारमा खाद्यान्न लगायत लत्ताकपडाको अभाव हुन नदिन वाणिज्य तथा आपूर्ति मन्त्रालयले दूतावासमा रहेका चिनियाँ अधिकारीसँग छलफल गरेको छ ।
वाणिज्य सचिव ङइन्द्रप्रसाद उपाध्यायका अनुसार चिनियाँ अधिकारीहरूले दसैंअगावै सुचारु गर्न सकिने आश्वासन दिएको बताउनुभएको छ । छलफलका क्रममा चिनियाँ पक्षले हरसम्भव प्रयास गर्ने आश्वासन दिएको बताइएको छ ।
मन्त्रालयका अनुसार तातोपानी र केरुङ– रसुवागढी नाका खण्डमा नियमित गइरहेको पहिरोका कारण बाटो सुचारुमा ढिलाइ भएको हो । उक्त सडक खण्डतर्फ चिनियाँ क्षेत्रमा करिब २५ किलोमिटर पहिराले अवरुद्ध पारेको छ ।
तातोपानी नाकामा नेपालतर्फका विभिन्न स्थानमा अहिले पनि पहिरो गइरहेकाले बाटो खोल्ने सम्भावना कम छ । त्यसैले पहिलो प्राथमिकता रसुवागढीलाई राखेको बताइएको छ ।
सचिव उपाध्यायका अनुसार अहिले खाद्यान्नमा तत्काल कुनै समस्या छैन । करिब ३ महिनासम्म पुग्ने खाद्यान्न मौज्दात छ । पेट्रोल र ग्यासमा पनि तत्काल ठूलो समस्या देखिएको छैन ।
नेपाल आयल निगमका प्रबन्ध निर्देशक गोपालबहादुर खड्काले इन्धन आयातमा मुख्यत रक्सौलमा समस्या देखिएको बताए । निगमसँग केही स्टक भए पनि ढुवानीमा अवरोध भइरहे समस्या हुन सक्नेछ ।
वाणिज्य तथा आपूर्ति व्यवस्थापन विभागका महानिर्देशक शम्भु कोइरालाले पनि बजारमा तत्काल समस्या नदेखिए पनि यस्तै अवस्था रहिरहे परिस्थिति सहज नरहने र समयमै ढुवानी गर्न सकिएन भने परिस्थिति सहज बनाउन नसकिने बताउनुहुन्छ ।

About

सत्य तथ्य समाचार,मनोरञ्जनात्मक खबरका साथै विश्वमा के घटना घटिरहेको छ संसारलाई एकै पटक र एकै ठाउँबाट हेर्नलाई नयाँ खबरमा प्रकाशित समाचार र विभिन्न भिडियोहरु हेर्नुहोस ।

Like Us