Friday, 24 July 2015

चारजना नेपाली दुईवटा ढुङ्गाको मूर्तिसहित भारतमा पक्राउ, अर्का एकजनाको मृत्यु


भारततर्फको सीमावर्ती क्षेत्र बहराइच जिल्लामा चारजना नेपाली दुईवटा ढुङ्गाका मूर्तिसहित पक्राउ परेका छन् भने अर्का एकजनाको मृत्यु भएको छ । मुत्यु हुनेमा कालीकोट जिल्ला चिलखाय गाविसका २७ वर्षीय खड्कबहादुर शाही रहेका छन् ।


सोही स्थानका लोकबहादुर शाही, टेकबहादुर शाही, तीर्थबहादुर शाही र अनिल शाहीलाई भारतीय सीमा सशस्त्र प्रहरी बल (एसएसबी) ले पक्राउ गरेको बर्दियाका प्रमुख जिल्ला अधिकारी विनोदबहादुुर कुँवरले जानकारी दिनुभएको छ । खड्कबहादुरको मृत्यु कसरी भएको हो भन्ने खुल्न सकेको छैन । भारतको सीमावर्ती क्षेत्र मृगिया मजगाउँमा पक्राउ परेका उनीहरुलाई एसएसबीले बहराइचको मोतीपुर थानामा बुझाएको थाहा भएको छ ।

अहिले उनीहरुलाई मोतीपुर थानाको हिरासतमा राखिएको एसएसबीका प्रहरी उपरीक्षक प्रदीपकुमार पालले जानकारी दिनुभएको छ । गत असार २७ गते कालीकोट जिल्लाको पाखा गाविस वडा नं ८ र ९ को सिमानामा पर्ने कालिकादेवी मन्दिरबाट तीनवटा ढुङ्गाका मूर्ति चोरेर आफूहरु भागेको बयान उनीहरुले दिएको बुझिएको प्रमुख जिल्ला अधिकारी विनोदबहादुर कुँवरले बताउनुभएको छ । प्रजिअ कुँवरका अनुसार घटनाको अनुसन्धान गर्न प्रहरी उपरीक्षक गोविन्दराम परियारको नेतृत्वमा एक टोली आजै बहराइच पठाइएको छ । रासस

About

सत्य तथ्य समाचार,मनोरञ्जनात्मक खबरका साथै विश्वमा के घटना घटिरहेको छ संसारलाई एकै पटक र एकै ठाउँबाट हेर्नलाई नयाँ खबरमा प्रकाशित समाचार र विभिन्न भिडियोहरु हेर्नुहोस ।

Like Us